Euver os
CV d'n Import is unne carnavalsvrundengroep oet Ulestjraote (Ulestraten). Van os lede zeen veul luu neet gebore in dit sjwan dörp en dus "import". Aangezeen ut veur os geïmporteerden jèl lestig waor um Prins van CV de Kuutebieters te weure, woort in 2013 ludiek un eige CV opgerich. In de optoch woort door ut Ulestraotse volluk democratisch de jerste prins veur ut nuuije jaor gekoze. Sindstoen beneume v'r eeder jaor unne prins of un prinses, keeze v'r un nuuj thema, loape v'r sjiek oetgedos mét in de optochte van Ulestraote en Meersje, weure carnavalsjlagers gemaak, boewe v'r wages en duuke d'r regelmatig online filmpkes op; altied mét unne flinke knipoug. D'r is gein bestuur, d'r zeen gein statute of notule en d'r is (bienoa) nwats gezeik. Ingebrachte ideeën weure jersj oetgelache, daonao creatief oetgewerrik en oeteindelik met verve oetgeveurt. D'n Import nump ut 'neet serieus numme' soms get erg serieus, meh ut geit veural um de lol, de lach, de spass, de vrundschap, ut plezeer en ....
af en toe same un lekker gleiske beer.
In 2024 bestong CV d'n Import 1 x 11 jaor, ut jerste jubileum ...
Geer dach zeker dat veer de pekskes allein in de optochte van Ulestjraote en Meersje aan hubbe.
Kiek hie onder veur de avonture die veer wiejer hubbe mètgemaak de aafgeloape joare ... 😉
Wèthawwer Molling heit de wageboewers van d’n Import benaderd um de appartemente neeve Leo inein te koome flatsje. Nao ut aafbreke van de wage op eschgoonsdig goon de manne aan de slaag. Volges Bart is ut ietsje mjer werrik es ut boewe van unne wage, mer heer verwach dat ut project rond Paosje opgeleverd weurt zudat Sjef en Annie van d’n Dohm d’r veur de zomer in kinne trekke … 😉
Ut heit effe gedoort, meh oeteindelijk hubbe veer de Love Boat wage van Captain Leon I oet 2023 un flink sjtuk gwratter en waterdich gemaak. De jerste cruise tickets nao de Bahama’s zeen al verkoch aan get bekinde gemeintegenote die (binnekort) veul tied hubbe en geir op vekansie goon … 😉
Es of v’r nao de optochte in Ulesjtroate en Meersje nog neet genog geloape hawwe, kreeg Keizer Gerard I in 2019 d’r neet genog van en trakteerde d’n Import op een vootreis nao Peking. De riksja’s hubbe ut lang volgehawwe, meh dei grwatte moer woar toch net get veul van ut gooie, mèt un grwat gaat in de optoch es gevolg … 😉
Wie d’n optoch in Meersje in 2016 woort aafgelasj door ut sjlechte weir hoofde Sambakeuning Frank I neet lang nao te dinke. Hup mèt de zjwumbrook in ut koffer op nao de sjtranden van Copacabana in Rio. Veer kriege nog eder joar un keersjkaart mèt un oetnwedding um dao d’n optoch te koome loape … 😉
Carnaval viere op z’n sjieks, dat kin nao Ulesjtraote en Meersje netuurlijk allein mer in Venetie. Nao de optochte van 2018 leete veer de Rialto wage van Principessa Bianca I bie Heusje sjtoon en vertrokke v’r mèt de gondelkes nao ut San Marco plein. De manne zeen nog un paar weke blieve hange um de jonges doa get te helpe mèt de toeriste … 😉
Nao ut springe wie unnen dulle op de loapbrug van de wage trok prins Ali Bart I in 2020 d’n Import wiejer nao de sjprookjes in de Arabische weireld. Heer koam dao op de Soek van Marrakech zelfs de burgemeister tege. Mirjam woar alvas ideeën aan ut opdoon veur de nuuij inrichting van de mèrret in Meersje … 😉
De rock-en-roll dansmoves in 2017 woare neet onopgemerrik gebleve aan d’n euverkant van ut water. Wekelang doa nog opgetrooije en gedans op de jukebox pleetsjes van King Ron I in Vegas. En wat doa wiejer allemoal gebeurd is ….. dat hubbe veer mer doa geloate … 😉
Nao ut hoole van zien aanhenger-riebewies woar ut nog mer unne kleine sjtap veur Captain Roel I in 2015 um zien vleegbrevet te hoole. D’n Import is gans kloar veur de forsj verwachte greuj van ut Vleegveld en de vrouwluu hubbe de auto’s alvast dao geparkeerd noe d’r nog sjus un paar plekke vrie woare … 😉
